كلمات : ضيا طحاوي
ما بين لقطات
تعدي حياتنا ع الهامش
تكون هي رصيد الحب والأفراح
يعدي الوقت ما نحسه
حتي العمر يتعد بليالي ملاح
تمر الساعة والتانية
خلاص خدنا النصيب كامل
مفيش فرصة ولو ثانية
ياريت العمر يستني
أو يقف الزمان بينا
بناس قاسمونا أحزانا
صورهم باقية حوالينا
يا دنيا ظالمه من بره
لكن عادلة بملامحنا
رضينا بجدول الفرقة
يفيدنا بإيه عذاب روحنا
بقسوة ولا ضحكة يوم
بإيدنا نداوي في جراحنا
ده لو كانت هموم بالكوم
عرفنا إيه يفرحنا
في كام لقطة ليهم عايشين
ما تحلي الدنيا غير بيهم
شريط ثابت يصحي الحمد والعرفان
لنعمة شاملة م العادل
يفوتها الذنب والنسيان
ما بين لقطات
تعدي حياتنا ع الهامش
تكون هي رصيد الحب والأفراح
يعدي الوقت ما نحسه
حتي العمر يتعد بليالي ملاح
